ازاي تذاكر للثانوية العامة
 |
| كيفيه المذاكره ثانويه عامه |
 |
| ازاي تذاكر ثانويه عامه |
 |
| نصائح ثانويه عامه |
كيفيه المذاكره للثانويه
المقال المنتظر لطلبة الثانوية العامة اللي عنده حد يشاركله البوست او يشاركه (ممكن كمان الكليات و أي حد بيذاكر يستفاد)
كنت بكلم بنوتة إمبارح فقالتلي "أنا محبطة، أنا كنت جايبة السنة اللي فاتت 80%، حاسة إني مهما ذاكرت مش هوصل"
الجملة دي كارثة! الجملة دي لو انتَ من أذكى أذكياء العالم كفيلة إنها ترميك في القاع!
مبدأيًا لو فاشل طول سنين اللي فاتت ارميهم من دماغك و ابدأ على نضافة عادي!
ابدأ إن انتَ إنسان جديد أول مرة تدخل تعليم في حياتك خالص
لو فضلت تقول لنفسك أنا مش هجيب، أنا فاشل، أنا هسقط، أنا مش هدخل الكلية، أنا أنا أنا أنا، الحقيقة إن في احتمالية نجاح و نجاح (مفيش حاجة اسمها فشل) بس الأكيد إنك هتعيش 10 شهور في حالة نفسية صعبة
طيب أنا بقالي سنين مش بعمل حلو
نحط إيدينا عل موضوع أنا مش حلو ليه؟
على فكرة ده ممكن بكل بساطة يتعمل بقاعدة مع نفسنا و بمقارنة درجات كل مادة باللي حواليها فأفهم نقطة ضعفي، يعني مثلًا:
بحل النظري صح و العملي غلط، يبقى محتاج أذاكر النظري مرة و أحل قصاده 3
بحل العملي صح و النظري غلط، يبقى محتاج أركز أوي عل نظري و أنا بذاكر
بنسى اللي أنا ذاكرته، يبقى محتاج أعمل أنا مع نفسي مراجعة إسبوعية لكل المواد (مش مستحيلة على فكرة) عشان منساش و أبقى حافظ زي اسمي (خصوصًا لحاجات المفاهيم و الذي منه اللي بتتنسي)
طيب مش عارف أنظم وقتي و أراجع، قبل ما تذاكر أي درس افتح كل الدروس اللي قبله في المادة و راجعها (مُدرسة العلوم/ الساينس كانت بتعمل معانا كده و كننا كلنا بنسمع المادة زي اسمهنا و فاهمنها صح جدًا)
طب هذاكر و بعدين أراجع! ده عمره ما هيحصل مجرد ما تذاكر هترمي الكتاب و تروح تلعب أو هتذاكر حاجة تانية فضيعت مجهود مذاكرة سابقة (كل ده للناس اللي بتنسى بسرعة)
الكتاب شكله كئيب ميشجعش، انزل أقرب مكتبة هاتلك ستيكي نوتس/ أقلام جاف بريما/ أقلام جليتر/ ماركر/ حاجات شكلها حلو تحطها قدامك و حاجات تستخدمها في الكتاب تفتح النفس.
بنسى حلمي كل شوية، اكتب ورقة قدام المكان اللي بتذاكر فيه و قول "إعلامية المستقبل"، "طالبة الأسنان"، "أنا مش هستسلم"، " أنا مش فاشل"، "اللي بيجتهد ربنا بيوفقه"، "أنا شايف نفسي كمان كام سنة في المكان الفلاني" أي حاجة تحمسك.
حاسس إني محبط و مش هنجح، ادخل في بروفايل أي حد ملهم بالنسبالك، صدقوني الناس دي بتعمل فرق رهييييييب خصوصًا لو حد خريج كلية بتحبها/ بيشتغل في مكان بتحبيه/ كان عنده مشاكل شبهك، فتحس إن في بينكم نقطة مشتركة تتحمس بيها
الناس بتقولي العب دلوقتي و ذاكر في الآخر عشان متزهش، على فكرة هي سنة واحدة!
الناس بتقولي ذاكر دلوقتي عشان لو دخلت في الجد من الأول هتزهق في الآخر، على فكرة هي برضه سنة واحدة
سنة واحدة اتشقلب فيها، 10 شهور استحملهم مش هيجرا حاجة
صحابي بيقولولي مش بفتح كتاب و أنا زيهم، صحابك يا هيسقطوا يا هيبرشموا و في الحالتين ده فشل، يا هيكونوا بيشتغلوكي و هيطلعوا من الأوائل و انتِ اللي تفشلي، من الآخر اللي يقولك مش بذاكر ابعدي عنه عشان همتك متضعفش
أصل أنا علمي و بتاع الأدبي مبيذاكرش زي!
بتاع الأدبي ليه تنسيق لوحده و حاجته لوحده
ايه علاقة ده بإنك علمي، بطل تبص عل حواليك و ركز في نفسك
أنا أدبي و طول النهار بسمع كلام سِم (الأدبي فشلة/ الأدبي مش بيذاكروا)
احدفله في وشه الفصل الثامن بتاع محمد علي و هو هيقولك "ده الفصل ده ميجيش نص فصل من الكيميا)، صدقني مهما حاولت تقنعه مش هيفهم و مش هتيأثر و هتفضل انتَ مُرفه فارمي الكلام بره دماغك 
:)
:)
الأدبي دول فشلة، على فكرة انتَ أدبي عشان حلم معين في دماغك، أو عشان ليك في المواد الأدبية مش العلمية، و ده كفيل يخليك ذكي و شاطر عارف انتَ بتحب ايه :)
:)
لازم تذاكر الصبح/ على مكتب/ في هدوء/ من غير موسيقى
كل ده هري و كلام فارغ، ذاكر في الوقت/ المكان/ الحالة اللي بتعرف تركز فيها انشالله لو ازاي مفيش قواعد للمذاكرة و التحصيل :)
:)
صدقيني يا ميرنا أنا فاشلة أوي و طول سنين حياتي منجحتش، شوف الفيديو ده بتاع رحاب هاني مدرس مساعد في كلية إعلام جامعة القاهرة كانت فاشلة زيك على فكرة بس ميأستش و قعدت تلعب في ثانوي و تقول لنفسها أنا فاشلة، لا عادي أنا بحب الكتابة و السينما و الدنيا اتضبطت :)
:)
على فكرة انت في شهر 11 و كل حاجة قدامك ملحوقة أوي، لسه بدري، ليه منستعينش بالله و نبطل نيأس هه؟ على فكرة كل حاجة عايز توصلها هتوصلها من غير كلية، الكلية بتعزز الموهبة اللي عندك أكاديميًا! طب هل ده معناه أفكس مخي من الكلية؟ لا طبعًا ما تقصَّر على نفسك المسافات و تدرس حاجة بتحبها بدل حاجة مش بتحبها، أنا بقولك كده عشان المخاوف اللي في بالك متأثرش عليك :)
:)
طب أنا أعمل ايه دلوقتي؟
ادخل السرير و فكر مع نفسك
1- نقطة ضعفي ايه
2- عايز أبقى ايه
3- أحمس نفسي ازاي
و اكتب كلامك ده في ورقة أو في الموبايل ونام
و اصحى تاني يوم إنسان جديد :)
:)